ءاسـرفـوفـن

مصطفى مازي

* تيبراتين كَزولنين

* تابرات تيس 9

* ءاســرفــوفـــن

ءاسمَّاقل#

… تيلاس ملكنت ءاماضال ، ءانزكَوم(1) سوتلن ءي ءولاون ، ءاكَاس(2) ءيفرد غ- ءيد بابنس ، ءاطّان ءيكَا تاقايت ءيوناروز(3) ، ءيرييين(4) دوسرفوفن(5)، سكرن كَيغ مكدا ران دّلن ءيخف سومالو نسن ءاسول ءور ءيسوينكَيم …

ماد كَيغ؟ ماغ ليغ؟ ماني ريغ؟ ، ءور سنغ ، تيكليت ءاد جليغ ، ءور كَيغ زوند ءافكَان ، ءار سيافاغ س-ءيخف ءينو كَيغ كرا ياضنين

– زوند ميت؟

ءور سنغ ، ءاسمَّاقل ءينو ءي تغاوسيوين ءور ءيكَا زوند ءاسمَّاقل ن-ميدن

– ءورتن جو يادلي ساسوا

ءيواليون ءينو مقار سمييلِّين(6) ءوراتن تفهامن ويياض …

توكَت نتغاوسيوين غوكَنس ءينو ءورا سيسنت سيافان غويلي ءييي ءيسوتلن ءامر نكي ، ءيد حينا ءار تكَاغ زوند ءيغور دّرغ ، ءار ءيييد تاشكان توكَت ن ءيسقسيتن س-ءيخف ءينو ءار تزايادن تاسّكَني(7) ياضنين ءي تيلاس دا ءييي ءيسوتلن ، مقارد ءاسوينكَم ءينو ءار ءييي ءيفال غ-تاسداوت(8) ءاد ءيزوكَ …

بودلغ ، كَيغ واياض ، داري توكَت ن-تيواركَيوين ءار سريتي تقلنت ءاتنتيد سفوغ س-تيلاوت(9) ، ييلي داري ءاوتاس(10) ضفرغت كيكَان ءاياد ، ءيقاند ءات لكمغ ، ماش مقارد ماياد ، جليغ ، ءور سنغ ماني ريغ؟ .. ماني مو كَيغ؟… ماخ ءايليغ درغ؟ … ماخ ءايليغ كَيغ غيكاد؟ …

**ءور سنغ**

كَاميغ ماد سريتي ءيسيافان ، كَاميغ ماد ءييي ءيتفهامن ، كَاميغ ءافوس ءيحنان … ريغ ءاد ءالاغ ، ءيمطاون غدرنييي ، ءورييي ران ، ريغ ءاد ءالغ ءاوال ءينو ءافاد ءاد ءيفاغ كولو مان ءيحبان غ-ءول ءينو ، ءور ءوفيغ ءادغار ماغا سكارغ ماياد …

رميغ تيموكريسين ، رميغ تودرت ، رميغ … رميغ … رميغ …ءور سول ريغ ءاد سفليدغ ءي ماد ءيهرشن … كَاميغ ءافساي – ءامر يــــان ، ءاد كَغ طيرت ءي ءيخف ءينو ، كَغ ءاسمون ءي تامتانت(11) ءاد هناغ ، نكَاراغ د دونيت ءاد ليغ ءور ءوفيغ ءافرا(12) ءينو …

سوينكَمغ غوفساي ءاد توكَت ن-تيكال ، ماش ءور داري تاسا نس **كَيغ ءاميكصوض**

ءيييه كَيغ ءاميكصوض ليغ طلغ ءي ءيخف ءينو س-مارور ، كَيغ ءاميكصوض ءايليغ كصوضغ ءاد ءيباقي ءوكَايو ءينو …

ءيغ موتغ ، ماني راد والاغ؟؟ مانيس راد فتوغ؟ ءيس راد نكَاراغ د ماياد لي ءييي ءيسيحلن؟

**ءور سنغ**

ءور سنغ ، مايان ءورت سفاوغ ، تايان ءورت ءيسفاو … يوف ءييي ءاد غاماغ غ-غيليغ سفاوغ … غيد ، ژضارغ ءاد ءافغ ءافساي ءيتموكريسين ءينو مقار تينيغ ماسد ءور ءيلا … ژضارغ ءاد سبادلغ توكَت ن-تغاوسيوين …

ختاد تكَا تاناغت نكَرييي د واطان ءينو ، ءيقاند ءاد تكَ تارناوت(13) تاسمونت ءينو زلوزوغ ءيرييين سيسفيوغ تيلاس ءاد ءيران ءاد ءيييي تسنكَيري د-تودرت ءينو ، رارغد ءاناروز ءينو …

**ءاناروز ءيدر ، ءور سار ءيموت ، نكنين ءاد ءيستاين ، ءيس راديس نمون؟ نغد ءات نادج ءاد ءيفتو نضفر ءاغاراس ن-تيلاس؟ …** ءور جوند تامتانت ءاد ءيكَان ءافساي(14) ن-تموكريسين نك ءايافكَان ، ءافساي ، ءافوس نك ءاغ ءيلا ، ءيغ طرژمت ءيخف نك ، راتي تافت …

ماغ ءاد تفاغت زغ تاسداوت ءان ليغن طياماژت راد تسنتيت تودرت تاماينوت ، لمد ءاد تماغت د-تيموكريسين نك تبيدت غ-منيد نسنت ، كَ ءامناي(15) ءاكور نرونت ، سرسد تاولافت(16) ن-ءيناك د-باباك غ-منيد نك ، سرسد تاولافت ن-تاوجا(17) نك ، سرسد تاولافت ن-يان تيريت د-ميدن ليك ءيران تعزوت دارسن … راداك ءيكَ ماياد ءاماواس(18) ءافاد ءاد تسوينكَمت غ-ماراد تسكرت تيكليت ياضنين …

ماياد لي ءييي ءيجران ، مقار ءييي ءيسرفوفن ، لمدغ كَيس ءاد بيدغ غ-منيد ن-تيموكريسين ءينو ، ماغ ءاداسنت ءافغ ءافساي س-حودوغ ءاطان ءينو …

تژضارت ءاد تافت ءافساي ، تژضارت ءاد تسّْنتيت(19) تودرت ياضنين …

**رژم ءالن نك ، دونيت ءور تمركس(20) غيكاد سا تي تانّايت** .

(1)ءانزكَوم : الهم

(2)ءاكَاس : الجرح

(3)ءاناروز : الأمل

(4)ءيرييين : الآلام

(5)ءاسرفوفن : العذاب

(6)سمييلين : واضحين “ءاسمييلي : وضوح”

(7)تاسّْكَني : السواد

(8)تاسداوت : حلقة

(9)تيلاوت : الواقع

(10)ءاوتاس : الهدف

(11)تامتَّانت : المنية ، الموت

(12)ءافرا : السلام

(13)تارناوت : النصر

(14)ءافساي : الحل

(15)ءامناي : محارب ، مقاتل

(16)تاولافت : صورة

(17)تاوجا : الأسْرة

(18)ءاماواس : مساعد

(19)ءاد تسنتيت : أن تبدأ “ءاسّْنتي : بداية”

(20)تمّْركس : معقدة

2020-03-08 2020-03-08
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

اكتب ملاحظة صغيرة عن التعليقات المنشورة على موقعك (يمكنك إخفاء هذه الملاحظة من إعدادات التعليقات)

المشرف العام